Tymi në gjigantin metarlugjik “Ferronikel” nuk do dal deri në fund të vitit.
Ani pse shpresa kishte që fabrika do i shpëtonte krizës, ato u shuan me datën 8 të këtij muaji.
Kjo meqë ndërmarrja vendosi që furra elektrike e cila ishte mbajtur tash e më shumë së një vit e gjysmë e ngrohte të fiket.
Ky vendim u mor ngase kompania nuk i bëri ballë çmimeve të larta të energjisë elektrike në tregun e hapur dhe çmimeve të ulëta dhe të paqëndrueshme të nikelit në bursat ndërkombëtare.
Zëdhënësi i ndërmarrjes “NewCo Ferronikeli”, Shpend Gudaqi tha që këta faktorë kanë krijuar vështirësi serioze për kompaninë gjatë 17 muajve të fundit, duke e bërë të pamundur prodhimin dhe shitjen e rezervave të depozituara për një periudhë të gjatë kohore.
“Përballë një krize të zgjatur, pa shenja të përmirësimit të shpejtë, menaxhmenti i NeËCo Ferronikeli Complex L.L.C është detyruar të marrë vendimin e vështirë për të fikur plotësisht furrën elektrike nga gjendja e ngrohtë, si dhe për të reduktuar orarin e punës për një numër punëtorësh, duke filluar nga data 16 prill 2025”, tha ai.
E ata që prekën më së shumti nga ky vendim janë punëtorët e kësaj ndërmarrje.
Këtyre do i preket paga por jo edhe puna.
“Kërkesë reale edhe minimale është që mënyra e pagesës së punëtorëve të jetë 75% e pagës. Po ju informoj që në këtë vendim shihet që 25% e orarit obligative të punës punëtorët të janë në Ferronikel, pjesa tjetër ose thënë më thjeshtë 5 apo 6 ditë janë në punë, e ditët e tjera të muajit të janë në shtëpi. Mënyra e pagesës qysh është paraparë me këtë vendim që është pakënaqësia jonë esenciale është mënyra e pagesës për këto pesë ditë që jemi në punë mu paguar 100% e ditët tjera çka nuk jemi në punë mu paguar 50 % të pagës bruto. Reagimi jonë pakënaqësia jonë është te elementi i pagesës, ne kemi me këmbëngul që kjo formë e pagesës të jetë 75% e pagës”, ka deklaruar kryetari i sindikatës së punëtorëve, Sejdi Morina.
Morina, kërkon ndihmë nga shteti, ani pse fabrika është e privatizuar.
Ferronikel fabrika që ka 800 punëtorë ka prodhuar dhe eksportuar nikel nëpër shumë vende të botës.
Kjo ka qenë kompani publike para se të privatizohej në vitin 2005.
Në vitin 2018, ajo është blerë nga kompania e Shqipërisë, Balfin Group.
Ndërkaq, rreth një vit më parë, ajo kaloi në pronësi të konsorciumit turk “Yildirim Group”.
