Tri sfidat e para të xhiros së 30-t janë mbyllur në Superligë.
Ballkani në “Sami Kelmendi” ka rrëshqitur, duke arritur të marrë vetëm një pikë nga sfida me Ulpianën. Të dy golat u shënuan në pjesën e parë të ndeshjes. Lipjanasit gjetën epërsinë me Egzon Qerimin në minutën e 20-t nga gjuajtja e lirë. Mirëpo therandasit u kthyen në lojë, duke barazuar shifrat me Korenicën në minutën e 49-t të kohës shtesë, por vetëm dy minuta para se të barazonin rezultatin Ermal Krasniqi dështoi të shënoj nga pika e bardhë.
Ballkani me këtë hap të gabuar në luftë për titull, është ende lider me 9-t pikë para Dritës dhe Gjilanit, kjo e fundit ka një takim me pak ku do ta zhvillojë nesër ndaj Dukagjinit në Klinë. Ndërkaq Ulpiana tani është ngritur në kuotën e 25 pikëve nga 30 ndeshje të zhvilluara.
Drita është kthyer të fitorja në elitën e futbollit kosovarë. Intelektualët triumfuan me përmbysje ndaj Malishevës, me rezultatin përfundimtar që ishte 3 me 1, ndeshje kjo e zhvilluar në stadiumin me bari sintetik në Gjilan.
Hyseni shënoi në minutën e 48-të për avantazhin e mysafirëve, por Ajzeraj, Namani dhe Tahiri e përmbysen rezultatin në mirë të skuadrës së tyre.
Drita pas kësaj fitorje është ngritur në kuotën e 55 pikëve, aq sa ka edhe Gjilani në vendin e tretë, që nesër e zhvillon takimin me Dukagjin. Ndërkaq, Malisheva pas kësaj humbje rrezikon vendin e gjashtë, pasi Drenica gjendet prapa saj me vetëm dy pikë mbrapa, e që të dielën luan me Prishtinën.
Ndërkohë, Feronikeli edhe zyrtarisht është larguar nga Superliga e Kosovës. “Industrialistët” kanë pësuar humbje me rezultat 0 me 2 nga Llapi.
Sadriu dhe Alidemaj shënuan golat për skuadrën e Tahir Batatinës. Kampioni i trefishtë i Kosovës, zë vendin e fundit me vetëm 12 pikë, dhe në sezonin e ardhshëm do të bëj gara në Ligën e Parë. Kurse, Llapi me këtë fitore ka bërë edhe një hap para për të siguruar një vend në Ligën e Konferencës. Ekipi llapjan tani është ngritur në kuotën e 50 pikëve, 12-t me shumë se Prishtina që ka një ndeshje me pak, derisa kryeqytetasit nesër luajnë ndaj Drenicës në “Fadil Vokrri”.
/Tëvë1/
