Faza e dytë e Superligës së Kosovës në futboll nis këtë vikend, me ndeshjet e xhiros së dhjetë që do të luhen përgjatë tri ditëve.
Të premten, zyrtarisht hapet kjo xhiro me ndeshjen që luhet në Drenas prej orës 13:00 ndërmjet Feronikelit ’74 dhe Ferizajt.
Kjo përballje është e rëndësishme për të dyja skuadrat që po luftojnë për t’u larguar nga zona e rënies në një kategori më poshtë.
Për dallim prej Ferizajt që ka tri fitore deri më tani dhe renditet i shtati në tabelë me 10 pikë, Feronikeli ’74 është në kërkim të fitores së parë këtë sezon dhe zë vendin e fundit pasi ka tubuar vetëm dy pikë, falë dy barazimeve karshi shtatë humbjeve.
Ferizaj në këtë përballje futet pas dy fitoreve rresht, ndërsa Nikli barazoi pa gola me Dritën.
Në duelin e parë të këtij sezoni në kuadër të xhiros së parë, Ferizaj ka mposhtur 2:1 ekipin nga Drenasi.
Të shtunën, luhen ndeshjet Dukagjini – Ballkani e Gjilani – Llapi kurse të dielën janë Malisheva – Drita dhe Suhareka – Prishtina, të cilat gjithashtu startojnë prej orës 13:00.
