Thuajse e tërë pasuria iu bë shkrumb e hi brenda disa minutave.
Ilaz Mustafës nga Stublla e Poshtme e Vitisë, iu dogj stalla bashkë me 43 dele.
“Veç kur e kemi pa jemi dal me djem me krejt çka kemi pas familje nuk kemi mundur asgjë më shpëtuar çka ka pas këtu, është kall edhe te kojshia, por dha Zoti erdhën zjarrfikësit e na ndihmuan se kemi duke u djegur me krejt”, thotë ai.
Ani se shkakun që erdhi deri këtu nuk e dinë, Mustafa thotë se i janë shkaktuar dëme të mëdha financiare.
“Duhet me i llogaritë domethënë 43 copa, nën 300 euro nuk kam pas vetëm dashi kishte me i bë 500/ 600 euro por unë po e lë 300 euro më të lirën aty mbërrijnë 12/13 mijë euro. Stallën kush e ndërton edhe kjo kushton me 7/8 mije euro nuk mundesh me ndërtuar.”, thotë Mustafa.
71 vjeçari tregon se i harroi dëmet materiale, kur pa që në këtë ndodhi të rëndë iu lënduan disa familjarë.
“Kur e kam pa gruan e vëllait në tokë shtirë i kam harru krejt, por deshi Zoti shpëtoi djali e ka djeg krahun”, shprehet fermeri.
E përveç që dolën për të shuar zjarrin, njëri nga zjarrfikësit shpëtoi edhe një grua.
“Me të marr lajmërimin menjëherë e kam nisur ekipin e parë për ne vendin e ngjarjes dhe kemi shtuar forcat shtese edhe forcat tjera me dy automjete e tri automjete gjithsej kanë shkuar. Është me rëndësi të shpëtohet jeta e njeriut në atë rast ka pasur krizë edhe për jetë njeriu. Një grua ka qenë e asfiksuar dhe nga vetë një udhëheqës skuadre që ka qenë me ekipin ia ka dhënë ndihmën e parë që e ka shpëtuar nga vdekja që ka qenë shumë në krizë”, tregon Hetem Jakupi, komandant i zjarrfikësve.
Për të parë nga afër dëmin dolën edhe krerët komunal të Vitisë.
“Ne e kemi një komision në kuadër të Komunës që do të dalin ata në vend të ngjarjes e do të vlerësojnë e do të shohim se sa janë dëmet në mënyrë që t’i dëgjomë letrat në ministri se aty është një fond i emergjencave. Kryetari i Komunës është në gjendje të i ndihmojë në ato kompetencat sa ne kemi por fondi për raste të tilla është në kuadër të ministrisë”, tha Basri Aliu –drejtor i Shërbimeve Publike dhe Emergjenca.
Në Kosovë përgjatë 24 orëve të fundit ka pasur vatra të shumta zjarri.
