Xhiroja e 23-të e Superligës së Kosovës në futboll do të karakterizohet me dy ndeshje derbi dhe në përgjithësi pritet të jetë shumë interesante.
Kjo xhiro, hapet të premten dhe përfundon të dielën, por vëmendja kryesore do të jetë të shtunën, ku në Suharekë dhe Podujevë na presin dy derbi.
Të premten, prej orës 14:00 luhet ndeshja Ferizaj – Suhareka, skuadra që synojnë pikët e plota në këtë përballje.
Në fakt, Suhareka në pesë ndeshjet e fundit ka marrë vetëm një pikë kurse Ferizaj ka tri fitore e dy humbje.
Të dyja skuadrat kanë tubuar nga 26 pikë dhe ndajnë pozitën e gjashtë dhe të shtatë në tabelë.
Të shtunën, Ballkani e pret Prishtinën kurse Llapi përballet me skuadrën e Dritës, ndeshje këto që gjithashtu startojnë në orën 14:00.
Edhe të dielën, do të luhen dy ndeshje që gjithashtu nisin nga ora 14:00: Gjilani – Feronikeli ’74 dhe Dukagjini – Malisheva.
