Skuadra e Fenerbahçes nuk e ka ndërmend të heq dorë nga rikthimi i Vedat Muriqit në Stamboll.
Ditë më parë u raportua se transferimi i Muriqit te Fenerbahçe është punë e kryer, ndërsa të martën mediumet turke kanë bërë publike edhe ofertën e klubit turk për shërbimet e sulmuesit kosovar.
Bëhet e ditur se Fenerbahçe është gati të ofrojë deri në 10 milionë euro për ta bindur Mallorcan në lirimin e Muriqit gjatë afatit kalimtar të janarit.
Paratë për Muriqin, skuadra turke do ti paguajë nga shitja e sulmuesit maroken Youssef En-Nesyri për 35 milionë euro tek ekipi nga Arabia Saudite, Al-Nassr.
Trajneri i Fenerbahçes po e sheh Muriqin si përforcim ideal për sulmin dhe gjasat janë të mëdha që marrëveshja të arrihet mes klubeve për transferimin e tij muajin e ardhshëm.
Muriqi ka kontratë me Mallorcan deri në vitin 2027 dhe këtë sezon ka shënuar 3 gola dhe ka bërë 2 asistime në 14 paraqitje për skuadrën spanjolle.
Muriqi e njeh mirë Superligën e Turqisë pasi në 112 ndeshje të luajtura ka shënuar 37 gola dhe ka bërë 14 asistime.
30-vjeçari ishte pjesë e Fenerbahçes në sezonin 2019/20, ndërsa në Turqi ka bërë karrierë edhe te Rizespori, Gençlerbirligi e Giresunspori.
