Deputetja e Vetëvendosjes, Arjeta Fejza, ka treguar se si janë bindur minatorët për ta ndërpritur grevën, pas takimit që ata kishin me disa deputetë të pozitës.
Fejza, tregoi që diskutimet në takim kanë qenë të gjata, ku kanë folur në mënyrën që të konkretizohen kërkesat e minatorëve.
“Diskutimet tona kanë qenë të gjera dhe të gjata për shumë çështje, mirëpo ato kanë qenë të konkretizuara në kërkesa për të cilat Ministra prandaj është dakorduar, në fakt në këtë rast Bordi Mbikëqyrës. Aktualisht Trepça ka ushtrues detyre në mandatit e kryeshefit, në aspektin ligjor është e caktuar periudha që mund të ketë ushtrues detyre një institucion, prandaj në këtë linjë edhe kjo është njëra ndër kërkesat që minatorët kanë pasur dhe sigurisht që në përputhje edhe me ligjin besoj që do të realizohet, në kuptimin që do të shpallet konkursi dhe do të ketë një proces transparent dhe të rregullt të përzgjedhjes së kryeshefit”, tha ajo në emisionin “Ditari” në Tëvë1.
Deputetja tha se në takim janë zotuar që në vazhdimësi do të kenë kontakte me Bordin Mbikëqyrës të ndërmarrjes “Trepça”.
“Në takimin që ne e kemi pasur jemi zotur që do të kemi kontakte të vazhdueshme me Ministrinë dhe Bordin Mbikëqyrës, në kuadër të së cilit do të interesohemi që këto kërkesa të realizohen. Bordi Mbikëqyrës do të angazhohet në përmirësimin e kushteve të punës, ku kjo është jashtëzakonisht e rëndësishme për minatorët dhe për mirë funksionimin e gjithë ndërmarrjes, tjetra ka pasur të bëjë me hapjen e konkursin për kryeshef dhe tjetra me shqyrtimin e vendimeve, të cilat janë ndërmarrë qoftë në raport me minatorët, qoftë vendime të tjera që në çfarëdo mënyre mund të kenë pasur ndonjë efekt jo pozitiv në ndërmarrje”, tha ajo.
Greva e minatorëve të Trepçës ka përfunduar në ditën e 10-të pas arritjes së marrëveshjes ndërmjet minatorëve dhe zyrtarëve të Ministrisë së Ekonomisë.
Marrëveshja është arritur në orët e vona të mbrëmjes së të enjtes, kur ata u vizituan nga deputetë të VV-së, përfaqësues të Bordit të ndërmarrjes Trepça dhe Ministrisë së Zhvillimit Ekonomik./teve1.info/
