Federata e Futbollit të Maqedonisë së Veriut i ka reaguar sulmuesit të Kombëtares së Shqipërisë, Mirlind Daku për sjelljet e tij pas ndeshjes me Kroacinë në kuadër të “Euro 2024”.
Shqipëria barazoi 2:2 me Kroacinë të mërkurën në kuadër të Grupit B, ndërsa pas ndeshjes Daku me altoparlant iu bashkua korit të tifozëve shqiptar për thirrjet nacionaliste ndaj maqedonëve dhe serbëve.
Të enjten, Federata e Maqedonisë së Veriut në reagimin e saj ka dënuar ashpër thirrjet nacionaliste të Dakut drejtuar shtetit maqedon.
Këtë sjellje, federata maqedone e ka quajtur të papranueshme dhe në kundërshtim me vlerat bazë të sportit dhe respektit të ndërsjellë që promovon futbollit.
Madje, federata i bën thirrje sulmuesit Daku që të kërkoj falje publike për sjelljen e tij dhe dëmin që ka shkaktuar. Po ashtu, u ka bërë thirrje edhe institucioneve përkatëse që të hetojnë këtë incident dhe të marrin masat e duhura disiplinore.
Në njoftimin e federatës maqedone thuhet se tashmë do t’i dërgohet edhe letër zyrtare UEFA-s për sjelljen skandaloze të Dakut.
