Në orët e hershme të se mërkurës qytetarë të shumët ia mësynë Prekazit.
Me autobusë, vetura e motoçikleta ata erdhën për të bërë homazhe në kompleksin “Adem Jashari” në ditën e nisjes së Epopesë së Ushtrisë Çlirimtare të Kosovës.
Mbi kullat e Jasharëve në këtë 5 mars u lëshuan paragllajdë të shumtë në shenjë nderimi për kontributin e kësaj familje.
E datën 5 mars të vitit 1998, e kujton më shumë emocione Gani Barani i cili tregon momentin kur automjetet e ushtrisë serbe u nisën nga Mitrovica për në Prekaz.
“Me kujtohet ajo ditë shumë qartë pasi shtëpinë e kam në qendër të Mitrovicës dhe kur kanë filluar herët shumë herët automjetet e ndryshme të drejtuar për këtu dhe kam menduar se në të vërtetë do të sulmojnë. Ngase këta unë i kam edhe familjar, konkretisht unë jam edhe nip i tyre dhe jemi tezaka. Në atë moment jam munduar të thërras me telefon fiks por nuk kam pasur mundësi por faktikisht këta kanë qenë të informuar . Prej Mitrovicës e deri këtu jam munduar me i informuar”, ka deklaruar ai.
Në këtë fshat të Skenderajt erdhi edhe Bekim Hoti, që nga pamja fizike duket sikurse Adem Jashari.
“Po mundohem që të i ngjaj për nga dukja fizike, po ndodh çdo ditë kur me shohin fëmija, rinia me ndalin për foto me japin komplimente pozitive. Arsyeja është pasi Adem Jasharin e kam idoll, ashtu sic duhet ta ketë çdo shqiptar që jeton në rruzullin tokësor sepse sakrifica e tij është aq sublime aq madhor saqe ne sot e gëzojmë lirinë”, tha ai.
Kurse një 15 vjeçar nga Skenderaj, këtë 27 vjetor të epopesë së UCK-së, vendosi të sjellë përmes këtij projekti emrat e 1432 fëmijëve të vrarë gjatë luftës.
Kam punuar projektin për 1432 fëmijë martirë të Kosovës e të cilët e kanë humbur jetën padrejtësisht nga gjenocidi shtetëror i Serbisë.
“Procedura me ka marrë kohë rreth dy muaj por Nustret Pllanës që i kam huazuar të dhënat secili është me emër të tij prej burimeve të sakta të Nustret Pllanës këtu mund të gjejnë edhe fëmijët e vet të cilët i kanë humbur gjatë luftës. Nuk e dijë ideja vetë me ka ardhur si shpërblim, që të jenë edhe këta pjesë e historisë e mos mu harru”, tha autori i punimit për fëmijët e vrarë, Fatjon Gashi.
Madje këtu u panë edhe mysafir nga Shqipëria të cilët ishin nisur në orën 2:00 të natës për të mbërritur në Prekaz.
“Ne në Prekaz ka 17 vite që vijmë jo sot që bëhen homazhet por edhe në ditën e Pavarësisë ishim këtu.Pa Prekaz nuk do të kishte Dardani .. mbi luftën dhe me Rezistencën e familjes Jashari i dha një jehon për liri dhe pavarësi Dardania”, tha qytetari nga Fieri, Kristajq Ziho.
Aktivitet për të shënuar 27 vjetorin e Epopesë së UÇK-së do të mbahen edhe me 6 mars, kurse me 7 mars epopeja si zakonisht me 7 mars me “Natën e Zjarreve” në Prekaz.
