Vetëm një foto i ka mbetur kujtim nga babai andaj edhe e ruan me shumë kujdes.
Jasmina Jovanoviq, banore e Shtërpcës nga komuniteti serb, që nga shtatori i vitit 1999 nuk di asgjë për fatin e babait të saj, Paun Zhivkoviq, që u zhduk disa muaj pas përfundimit të luftës në Kosovë.
Me lot në sy ajo tregon se për çdo ditë jeton me dhimbje duke pritur se do të dëgjojë diçka për të.
“Babai im ishte drejtor i një shkolle të mesme në Ferizaj. Ai ishte shumë i pasionuar pas edukimit dhe shkencës. Ai një ditë shkoi tek shkolla në Ferizaj për të marrë disa dokumente të nxënësve meqë po zhvendosej për në Shtërpcë. Por, kur shkoi aty disa persona me uniforma të zeza e kishin kapur atë duke e dërguar në një drejtim të panjohur. Kjo është krejt çfarë kam dëgjuar”, tregon Zhivkoviq.
Dhimbje të njëjtë ndan edhe Salih Muhaxheri, kryetar i Shoqatës së të Pagjeturve nga Ferizaj.
Ai çdo ditë punën e nis duke e shikuar fotografinë e gruas së tij, Sanijes, e cila u zhduk më 16 prill të vitit 1999, gjatë luftës së fundit në Kosovë.
Muhaxheri rrëfen për momentin e fundit kur dëgjoi nga gruaja e tij.
“Unë në atë kohë isha në fshatin Dërmjak së bashku më ushtarët e Ushtrisë Çlirimtare të Kosovës. Gruaja nga Ferizaji i kishte blerë disa gjëra ushqimore për të na i sjellë në fshat ku po qëndronim. Nga ai moment nuk kemi dëgjuar më kurrë për fatin e saj”, tha Muhaxheri.
Mirëpo shpresat e familjarëve për zbardhjen e fatit e më të dashurve të tyre nuk vdesin kurrë.
“Nuk jam ndalur asnjë ditë duke kërkuar për babin tim. Dua ta di se ku është dhe çfarë ka ndodhur me të. Unë e di se po plakem por asnjëherë nuk do të dorëzohem deri sa ta kuptoi se ku është baba im. E kam shumë të vështirë për të folur”, thotë Jasmina Jovanoviq.
“Me thënë të drejtën njeriu i përballon disa sfida duke shpresuar për më të mirën. Ne kemi shpresuar se një ditë Sanija do të vijë tek ne. Edhe katër fëmijët e mi kanë shpresuar shumë për këtë gjë”, shprehet Salih Muhaxheri.
Familjarët e personave të pagjetur po kërkojnë më shumë angazhim nga institucionet vendore dhe ndërkombëtare për zbardhjet e fatit të më dashurve të tyre.
