Autori: Adea Mustafaj
Një hall e ka kapluar këtë qytetar nga Prishtina.
E qaren nuk po mundet t’a bëjë në asnjë formë.
Ali Latifi ka babanë e tij të shtruar në repartin e Neurologjisë brenda Qendrës Klinike Universitare të Kosovës (QKUK).
95-vjeçari, i paralizuar, me kërkesë të repartit, mas mjekimit që mori, i duhet të lirohet nga spitali dhe ta vazhdojë trajtimin në shtëpi.
Por, siç thotë djali i tij, për shkak të moshës dhe gjendjes shëndetësore që ka, ai po e ka të vështirë që babanë ta dërgojë në shtëpi.
E ndihmë, Latifi thotë se ka kërkuar nga Emergjenca e QKUK-së, por sipas tij, të njëjtit nuk i kanë bërë një zgjidhje.
“Më thanë se ne nuk i bartim prej spitalit në shtëpi, është problem i juaj. Atëherë unë kërkova ndihmë nga Qendra të Emergjencës. Shkova fizikisht dhe shefi i Emergjencës të datës sot 05.11 më tha ky është problem i juaj, ne këtu nuk i bartim edhe pse e informova që është i moshës 95-vjeçare dhe është i paralizum në kamën e djathtë dhe dorën e djathtë, as që e morën parasysh” , ka thënë Latifi
Për t’i ndihmuar, Latifi thotë se kishte kontaktuar edhe ekipet private, por ata, bën të ditur se i kishin thënë se nuk kanë personel.
“U orientova te emergjencat private dhe i mora disa numra të telefonit që ishin për rreth spitalit. I thirra edhe ata, prapë ata më janë përgjigjur se nuk kanë shofera. Një herë më thanë se kushton kaq. I thash nuk është çështja e problemit të pareve se prind e kom duhet ta qoj në shtëpi. Mirëpo deri më tani nuk ka kurfarë zgjidhje” , është shprehur tutje Latifi
E për këtë çështje, televizioni ka kontaktuar edhe QKUK-në. Ata thanë se një gjë e tillë, nuk është përgjegjësi e tyre.
“QKUK nuk mirret me transport, nuk ka të drejtë ligjore. Jemi Qendër terciare, vetëm me trajtim. Obligim ligjor e ka Mjekësia familjare”, ka njoftuar zëdhënësi i QKUK-së.
Tëvë1 ka kontaktuar edhe drejtoreshën e Qendrës së Mjekësisë Urgjente në Komunën e Prishtinës, Amire Dragusha.
E njëjta tha se bartja e pacientëve nga Spitali në shtëpi nuk bëhet në rastet kur gjendja shëndetësore e pacientit është stabile.
Se një shërbim i tillë nuk ofrohet nga QKUK-ja e thotë edhe njohësi i fushës së Shëndetësisë, Bujar Vitija.
“Realisht QKUK nuk e ka për detyrë transportin e pacientëve jashtë institucionit. Në këtë rast fatkeqësisht nuk ekziston një shërbim publik për transportimin e pacientëve nga institucionet shëndetësore në shtëpitë e tyre. Kjo bëhet kryesisht nga shërbimet private të cilat paguhen nga familjarët. Në rastin më të mirë mundet me ndihmu shërbimi i Urgjencës së komunës, por nuk e kanë obligative”, është shprehur Vitija.
Latifi tha se deri tani është në pritje të ndihmës nga shoqëria civile.
