Autori: Adea Mustafaj
Në një shtëpi të vjetër pranë qendrës së qytetit në Istog, po jeton në kushte të vështira familja Vrankaj.
Nga sëmundjet që i ka, kryefamiljari Gazmendi thotë se e ka të vështirë të punojë.
E së fundmi, ai ishte shtrirë edhe për trajtim në Spital.
Mirëpo, nga pamundësia për t’i mbuluar shpenzimet, ai tregon se është detyruar të nënshkruaj vullnetarisht që të lirohet nga spitali.
“Një muaj e një apo dy javë kam qenë në spital, po ma nuk mujta me nejt se u deshke inikciat edhe barnat me i pagu. S’kisha me ju thonë të drejtën pare. Se me një social ku me ja mbajt. E shkaku i kësaj lypa vetë me u nënshkru edhe me dal prej spitalit…Kam pas apces në mushkëri. Kom hek kelb prej mushkërive. Tani mi kanë zbulu edhe tjera sëmundje. Kom me mushkëri turbukulozin, e kom sheqerin, e kom gjakun e nalt, gjakun e trash nuk mundet me mu t’hollu në vena, knena me unaza kom problem”, ka thënë kryefamiljari.
Kjo familje shtatëanëtarëshe po mbahet vetëm nga puna e djalit të tyre 17-vjeçar, i cili thotë se një ditë i paguhet 10 euro.
Hall, kjo familje po e ka edhe sëmundjen e vajzës së tyre më të vogël.
Nëna Kloentina thotë se 4-vjeçares i është thënë se duhet të trajtohet jashtë vendit.
“Ajo nuk mundet me u rrit normal sikur një fëmijë. Më kanë thënë se duhet me e qu në shtete të jashtme, po s’kom pas kushte edhe më ka metë qika qashtu. Nuk hec hiq, as nuk fol. Pak krejt se ka problem me kurriz të shpinës problem, me tru të vogël më kanë thënë mjekët”, ka thënë bashkëshortja e kryefamiljarit.
Ndërsa dy djemtë dhe vajza tjetër e kësaj familje janë larguar nga bankat shkollore tash e dy vite.
Kjo për shkak të bullizimit që ju kishte ndodhur në shkollë nga shokët dhe shoqet e klasës.
“I kanë rreh, i kanë thonë fjalë domethënë magjup e qeshtu. Po nejse nuk prish punë, na jem njerëz tonë. Shqipen po e foli… Më ndihmon ka pak në dru me i pru mrena, me i qa qe besa na njo, se vetë spo muj. Që besa me më qu deri në shitore se unë s’po muj me ec prej unazave. Tanë ditën qitu rat”, është shprehur tutje kryefamiljari.
Kjo familje ka vetëm një kërkesë.
“Ju kisha lut, kush ka me na ndihmu për hir të Allahut dhe hatri i këtyre fëmijëve, me na ndihmu, farë toke, far shtëpie. Një kolibë me u kon veç ku me qitë kryt mbrenda, ju kisha falenderuar shumë”, ka përfunduar kryefamiljari
Kryefamiljari thotë se qiranë e shtëpisë ku janë duke banuar aktualisht e paguajnë 120 euro. E në këto kushte, siç thotë ai, po jetojnë që 7 vite.
Personat që duan të ndihmojnë këtë familje mund të kontaktojnë në numrin 049-424-785.
