Ende pa e mobiluar nga dëmet që i shkaktoi zjarri i fundit, kjo shtëpi dy katëshe u dogj përsëri.
Është kjo hera e pestë që familjes Salihu nga fshati Talinovc i Muhahxerit në Ferizaj është duke i ndodhur ky incident.
Pronari i shtëpisë Ylber Salihu, i mërzitur nga ndodhia, tregon se anëtarët e familjes pësuan lëndime nga zjarri.
“E gjitha çka mundem me shpëtuaR është kjo gjendja qysh po shihet këtu. I thash merri fëmijët e dil jashtë në momentin që më tha është duke u djeg garazh e kam ditë që është me dërrasa e si të kaplon edhe kulmin nuk ka shpëtim. Kjo ishte apeli kryesor që ia kam bë bashkëshortes vetëm të dal përjashta. Tymi në gjoks e ka mundu ka marr oksigjen e inhalime, sot kemi shkuar përsëri në Emergjencë duhet të trajtohet ende”, ka thënë Salihu.
Megjithëse shtëpia u kaplua nga zjarri edhe katër herë të tjera, Salihu tregon se zjarri i fundit ishte më i rëndi.
“Më 20 prill para orës 08:00 në mëngjes u kapluar nga flaka një dhomë shtratit i ka dal tymi. Më 21 dhomës në katin e dytë, më 22 shupa mbrapa meje që është, më 23 salloni janë kanë dëme. Por kjo që ndodhi dje ka djeg gjithçka edhe është e pabanueshme më”, shtoj Salihu.
Përkundër gjithë këtyre zjarreve të shkaktuara, Salihu tregon se autoritetet përgjegjëse akoma nuk e kanë gjetur shkakun.
Të kontaktuar nga televizioni, KEDS-i ka konfirmuar se energjia elektrike nuk është shkaktare për këtë zjarr.
“Çdo ditë po digjet nga një dhomë, kemi provuar me rrym aty nuk është problemi. Këtu diçka është faktor tjetër se çfarë faktori është nuk po e dimë as ne njëherë a është faktori njeri a janë faktorët të natyrave të ndryshme”, ka përfunduar Salihu.
Rastin janë duke e hetuar organet e rendit.
“Nga informacionet fillestare, kemi mësuar se banorët e shtëpisë kanë arritur të largohen në kohë, ndërsa shtëpia ka pësuar dëme të mëdha materiale. Hetimet lidhur me shkaqet e zjarrit janë në proces”, thuhet në grafikën e policisë
Në shtëpinë tashmë të shkatërruar në tërësi, për katër orë intervenuan zjarrfikësit.
“Zjarri ka qenë i përhapur nuk ka qenë vetëm shtëpia ka qenë edhe një garazh edhe objektet ndihmëse që kanë qenë afër me shtëpinë dhe ka qenë një zjarre bukur i madh e është dashur kohë. Zjarri është lokalizuar por, aty është lënduar edhe një zjarrfikës ka marrë lëndime në kraharor pasi që i ra një tjegull nga lartë. E menjëherë ka reaguar ndihma e parë, zjarrfikësi për momentin është mirë” , ka thënë Jeton Avdiu, zhëdhënës komandanti i Zjarrfikësve.
E pronari i shtëpisë, Ylber Salihu tash po kërkon ndihmë nga bamirësit, në mënyrë që ta siguroj një strehë të sigurt për familjen pesë anëtarëshe.
