Trajneri i Comos, Cesc Fabregas ka pasur fjalë të mëdha për mbrojtësin e krahut, Mërgim Vojvoda, të cilin e ka transferuar skuadra e tij në ditën e fundit të afatit kalimtar.
Vojvoda u transferua te Como nga Torino dhe me ekipin e ri ka firmosur kontratë deri në verën e vitit 2028.
Como ka paguar rreth 2 milionë euro për Vojvodën, paga vjetore e të cilit do të jetë rreth 1.8 milionë euro.
Trajneri i Comos, Fabregas e sheh si përforcim të rëndësishëm Vojvodën duke thënë se përvoja e tij në Serie A do ti ndihmojë shumë.
“Mërgimi sjell përvoj dhe stabilitet defensiv në ekipin tonë. Aftësia e tij për të luajtur në disa role në mbrojtje dhe përvoja e tij në Serie A do të jenë të vlefshme derisa ne vazhdojmë ta forcojmë mbrojtjen”, ka thënë Fabregas.
Ndërkohë, edhe Vojvoda ka thënë se është i lumtur me transferimin e tij te Como dhe është plotësisht gati ta ndihmoj ekipin në arritjen e objektivave.
“Serie A nuk është ligë e lehtë, por mendoj se ekipi ka cilësi. Kam biseduar me trajnerin dhe jam këtu për të punuar për projektin”, ka thënë Vojvoda.
Vojvoda 30-vjeçar prej vitit 2020 ishte pjesë e Torinos dhe këtë sezon ka regjistruar 17 paraqitje në kampionat.
