Agjencia evropiane e policisë, Europol bëri të ditur, të mërkurën se ka shkatërruar një nga rrjetet më të mëdha të prodhimit të drogës.
Sic raporton DPA, ky ishte operacioni më i madh kundër tregtisë së drogave sintetike, deri tani, që përfshiu disa bastisje kundër grupeve kriminale dhe zgjati më shumë se një vit.
Njëzet e katër laboratorë, që përdoreshin për prodhim janë nxjerrë jashtë funksionit dhe 85 të dyshuar janë arrestuar, njoftoi Europol, përfshirë dy udhëheqës të dyshuar, në Poloni, nga ku u koordinua krejt operacioni
Sipas autoriteteve doganore gjermane, në gjithë vendin janë zbuluar gjashtë laboratorë të paligjshëm të drogës.
“Në nivel kombëtar, janë sekuestruar mbi 800 kilogramë droga sintetike dhe rreth 160.000 litra mbetje kimike shumë toksike”, tha Tino Igelmann, shef i Zyrës së Hetimeve Penale të Doganave, në një konferencë për media në Këln. “Si në Gjermani ashtu edhe në Evropë, këto përmasa janë të papara deri më tani”.
Europol, që u ofron mbështetje vendeve anëtare të BE-së në hetime në fusha si krimi i organizuar dhe terrorizmi, tha se në total janë sekuestruar rreth 1.000 tonë kimikate, të cilat mund të ishin përdorur për të prodhuar qindra tonë droga të forta, si MDMA, amfetamina dhe metamfetamina.
Droga sintetike e prodhuar nga kimikate paraqet një rrezik veçanërisht serioz për shëndetin ndërsa përbëjnë një problem të madh mjedisor.
Sipas Europol-it, kimikatet janë importuar në Evropë nga disa kompani që dukeshin të ligjshme.
Më pas, në Poloni u janë vendosur etiketa të rreme dhe më pas janë dërguar në disa vende të tjera.
Gjatë operacionit, janë kontrolluar dhjetëra objekte dhe janë sekuestruar automjete, pasuri të paluajtshme, para të gatshme dhe drogë.
