Eurodeputeti austriak, Lukas Mandl, ka thënë se vendosja e masave ndëshkuese ndaj Kosovës ka qenë e gabuar dhe se duhet të ketë përpjekje për tejkalim të tyre.
Sipas tij, të njëjtat po bllokojnë shumë zhvillime brenda Kosovës, në fushën e arsimit ekonomisë dhe të shëndetësisë.
Po ashtu, Mandl tha se ndërmjetësimi i dialogut Kosovë – Serbi nga Bashkimi Evropian duhet të jetë më i mirë dhe se do të angazhohet për një gjë të tillë.
“Ka çështje të brendshme në Kosovë, ku duhet të përpiqemi të tejkalojmë të ashtuquajturat masa nga Bashkimi Evropian, të cilat realisht po bllokojnë shumë zhvillime brenda Kosovës në fushën e arsimit, në fushën e ekonomisë, në fushën e shëndetësisë. Është ide e gabuar të vendosen masa kundër Kosovës nga ana e BE-së”, tha ai.
Tutje ai tha se i takon partnerëve brenda dialogut që të diskutojnë siç duhet dhe të arrijnë rezultate.
Mandl theksoi se Kosova duhet të angazhohet më shumë në forcimin e partneritetit me miqtë dhe partnerët ndërkombëtarë.
“Të forcosh lidhjet nuk do të thotë vetëm të komunikosh, nuk do të thotë vetëm të jesh i përgjegjshëm, por do të thotë gjithashtu të jesh i besueshëm në çdo proces… Unë do të vazhdoj t’i rekomandoj çdo pushteti, pushteti politik apo shoqërisë civile dhe të gjitha fuqive të tjera brenda Kosovës që të forcojnë lidhjet me partnerët, veçanërisht në Evropë, por në mbarë botën”, shtoi Mandl.
Kështu deklaroi eurodeputeti austriak pas pjesëmarrjes në konferencën “Diplomacia Parlamentare për Sigurinë Rajonale dhe Integrimin Euroatlantik”./teve1.info/
