Kombëtarja e Gjermanisë në basketboll, është finalistja e parë e kampionatit evropian, Eurobasket 2025, që sivjet po mbahet në Qipro, Finlandë, Poloni e Letoni.
Në gjysmëfinale, kampionia aktuale e botës, e mposhti Finlandën e Edon Maxhunit, me rezultat 98:86, duke qenë në avantazh të lartë gjatë gjithë ndeshjes. Vendimtare ishte periudha e dytë, kur Gjermania, me Denis Schroder dhe e Franz Wagner, arritën epërsi prej 14 pikëve, 61-47.
Finlanda u afrua deri në minus 6 pikë gjatë periudhës së tretë, por në etapën e fundit, gjermanët rikthyen epërsinë e lartë duke e rritur atë deri në plus 15 pikë.
Schroder me 26 pikë e 12 asistime dhe Wagner me 22 pikë e 5 kërcime ishin më të dalluarit në fitoren e Gjermanisë.
Maxhuni i realizoi 9 pikë dhe 2 asistime në këtë ndeshje derisa ai ishte basketbollisti më efektiv te Finlanda nga largësia, duke e ndihmuar kombëtaren të arrij sukses historik, në Eurobasket.
Gjermania e pret sonte kundërshtarin në finale, në ndeshjen ndërmjet Turqisë e Greqisë, derisa Finlanda do të luaj për medalje të bronztë, me humbësin nga gjysmëfinalja e dytë.
