Kreu i Misionit EULEX, Giovanni Pietro Barbano, të martën ka vizituar Institutin e Mjekësisë Ligjore (IFM), ku ka zhvilluar një takim me Drejtorin në detyrë, Agron Thaqi, për të diskutuar progresin në kërkimin dhe identifikimin e personave të zhdukur.
Sipas njoftimit, zyrtar, gjatë vizitës, Barbano ka riafirmuar angazhimin e EULEX-it për të mbështetur IFM-në me ekspertizën forenzike, duke siguruar që familjarët e personave të zhdukur të mësojnë të vërtetën, pa dallim të përkatësisë etnike, fetare apo kombëtare.
Megjithatë, kreu i EULEX ka shprehur shqetësim për vonesat në rindërtimin e ambienteve të Institutit, duke theksuar se kjo situatë po pengon rifillimin normal të operacioneve dhe krijimin e kushteve të përshtatshme të punës.
Ai gjithashtu ka theksuar se është shqetësuese që pozita e Drejtorit të Përgjithshëm të IFM-së është mbuluar me një drejtues në detyrë që nga shtatori i vitit 2021, duke shprehur shpresën se situata do të zgjidhet sa më shpejt në mënyrë të qëndrueshme.
Në njoftim nënvizohet se, sipas të dhënave zyrtare, gjatë vitit 2025 janë kryer 72 operacione në terren dhe janë përfunduar 27 identifikime të reja.
