Nga gjyqësori i Kosovës, po kërkohet që të kenë si prioritet trajtimin e rasteve të korrupsionit të nivelit të lartë dhe politikanëve. Një gjë e tillë, sidomos në rastet e korrupsionit, vlerësohet se duhet të reflektohet nga gjykatat në nivel vendi.
Prioritet për gjyqësorin, u kërkua të jenë rastet që përfshijnë korrupsion të nivelit të lartë dhe politikanë.
Për gjyqet e këtyre kategorive, raporti i EULEX-it, thotë se gjykatat duhet të sigurojnë që të mos ketë vonesa, që të shmanget përshtypja se gjyqësori i Kosovës nuk është i gatshëm për t’i gjykuar këto raste.
Pas këtij rekomandimi, konsiderohet se Këshilli Gjyqësor duhet të reflektojë dhe të tregohet me efikas.
“Mostrajtimi i këtyre rasteve me prioritet jep motivacion për që edhe qytetari i zakonshëm të merret me çështje apo vepra të njëjta. Kështu që, do të ishte mirë që Këshilli Gjyqësor, ta marrë këtë sugjerim dhe ta aplikon këtë në gjithë sistemin, për t’i trajtuar me prioritet korrupsionet e profilit të lartë, duke i gjykuar sa më shpejt të jetë e mundshme”, tha avokati.
Vonesat në procedimin e rasteve gjyqësore, vlerësohen se kanë të bëjnë me mospërmbushjen e kushteve për mbajtje të seancës.
“Në të shumtën e rasteve për shkak të moskrijimit të kushteve ligjore për të vazhduar me seancën, dhe në disa raste të tjera mund të jetë arsye të ndryshme që Gjykata nuk ka arritur t’i sjellë të gjithë të akuzuarit në tavolinën e të akuzuarve, që të ketë proces gjyqësor. Kemi raste edhe kur si rezulat i mostrajtimit adekutat, janë parashkruar“, tha Anton Nrecaj nga Instituti Clard.
Një potencial për parashkrim, është përmendur edhe në raportin të EULEX-it, i cili e ka quajtur si rezultat i zvarritjes së procesve dhe progresit të paktë në trajtimin e rasteve të profilit të lartë.
