Emisari i Shteteve të Bashkuara të Amerikës, Gabriel Escobar, deklaron se serbët në Kosovë duhet të jetojnë të sigurt dhe dinjitetshëm, duke shtuar se për këtë përgjegjëse do ta mbajnë Qeverinë e Kosovës.
Escobar këto deklarata i dha gjatë vizitës në Pejë, ku ishte i shoqëruar me kryetarin e qytetit, Gazmend Muhaxheri.
“Sa i përket Qeverisë së Kosovës, ata kanë përgjegjësinë për ta arritur këtë dhe ne do t’i mbajmë ata përgjegjës për këtë. Unë mendoj se të gjithë njerëzit në Kosovë mund të llogarisin në mbështetjen amerikane për shqiptarët, serbët, boshnjakët, të gjithë ata që jetojnë në këtë vend. Shpresoj se ata mund të ndjejnë mbështetjen amerikane dhe partneritetin amerikan”, ka thënë Escobar, në një intervistë për Radio Gorazhdevac.
Gjatë kësaj vizite, ai tha se serbët në Kosovë po vuajnë për shkak të vendimit të BQK-së.
“Këtu ka një komunitet që po vuan vërtet. Ka njerëz që përballen me probleme reale për shkak të mungesës së mundësive për të marrë pensione. Kështu që unë me të vërtetë dua të punoj me qeverinë e Kosovës me shpresën për të gjetur një zgjidhje urgjente”, tha ai.
Gjithashtu, ai tha se janë duke punuar në zbatimin e marrëveshjes për normalizim mes Kosovës dhe Serbisë.
“Ndërkohë, në një afat më të gjatë, ne ende duhet të punojmë shumë për të zbatuar marrëveshjen historike të normalizimit që arritëm marsin e kaluar. Kështu që ne do të vazhdojmë të punojmë”, tha Gabriel Escobar.
Ai tha se të gjithë qytetarët që jetojnë në Kosovë kanë mbështetjen e Shteteve të Bashkuara të Amerikës./teve1.info/
