Kritika për Kosovën dhe Serbinë, për mos zbatim të marrëveshjeve të arritura, kanë ardhur të shtunën nga emisari amerikan për Ballkanin Perëndimor, Gabriel Escobar.
Ai mori pjesë në inaugurimin e presidentit të ri të Malit të Zi, por ndau kohë të japë një intervistë të shkurtër për RTK-në.
Ai tha se asnjëra palë s’po e zbaton marrëveshjen dhe se po e presim versionin e Kosovës për statutin e Asociacionit.
“Me duhet të them se asnjëra s’po zbaton marrëveshjen, dhe më duhet të them që ne duhet të ecim përpara me te gjitha elementet përfshirë dhe specifikisht Asociacionin e komunave me shumicë serbe. Ne po presim versionin e Kosovës për statutin e Asociacionit, e kjo duhet të bëhet tash”.
Ai tha se është përgjegjësi kryesore e Kosovës që të ecë përpara me Asociacionin e komunave me shumicë serbe.
“Jo të gjitha duhet bërë, por është përgjegjësi kryesore e Kosovës që të ecë përpara me Asociacionin e komunave me shumicë serbe. Çka duam ne si SHBA që është statuti për Asociacionin do të duhej kryer e të bëhet sa më parë. Po shpresoj që kjo të kryhet së shpejti.:Jo me presidenten ende nuk kemi diskutuar, me kryeministrin po në Bruksel dhe ka qenë tema kryesore e takimit tonë në atje”.
Tutje ai tha se duhet të fillojnë menjëherë me vullnet të mirë në implementimin e të gjitha elementeve të saj.
“Mund të them se për Serbinë dhe Kosovën urgjente është që të rifokusohen në normalizim, që të punohet për rikthim të serbëve në institucione dhe të fillojnë të mendojnë si t’i normalizojnë marrëdhëniet e tyre. Kjo është edhe esenca e krejt marrëveshjes. Ne duhet të fillojmë menjëherë me vullnet të mirë në implementimin e të gjitha elementeve të saj”.