Federata e Futbollit të Kosovës dhe sponsori i Superligës, Albi Mall, vazhdojnë të ndajnë çmimin “Ylli i Javës”. Ky çmim për javën e 33-të në Albi Mall Superligë i është ndarë futbollistit të FC Ferizaj, Erion Sadriu.
Vlerësimi i më të mirit të javës është bërë nga Komisioni i Veteranëve të Futbollit, në përbërje të Berat Berisha, Besim Slishani, Shyqri Salihu. Ky komision vendosi që çmimi “Ylli i Javës” për xhiron e tridhjet e tre t’i takojë Erion Sadriut, i cili ishte më i dalluari me golin e tij kundër KF Llapit, duke siguruar një pike të rëndësishme për FC Ferizaj.
Pasi mori këtë çmim, Sadriu u shpreh i lumtur që u vlersua më i miri i javës: “Duke e ditur që në sezonin pranveror kemi performuar shumë mirë, objektivat fillestare ishin që të jemi sa më larg zonës së kuqe, por pas performancës sonë kanë ndryshuar edhe objektivat. Atmosfera te FC Ferizaj është shumë e mirë, duke pasur parasysh që çdo ndeshje e marrim një nga një.
Ndeshja në “Zahir Pajaziti” ishte shumë e vështirë, me më shumë duele dhe luftë, sepse secila nga dy ekipet i dëshironte pikët e plota. Ishte një ndeshje e mirë.
Po të ishte në dorën time, secilit lojtar të FC Ferizaj do t’ia jepja çmimin Ylli i Javës, pasi kemi performuar shumë mirë.
Dëshiroj të falënderoj familjen time dhe rrethin tim që më kanë qëndruar afër dhe kanë besuar në potencialin tim, si dhe tërë klubin tim, Ferizajin.” – tha ai për faqen zyrtare të FFK-së.
