Presidenti turk Rexhep Tajip Erdogan sërish ka kundërshtuar propozimin e SHBA-së për zhvendosjen e palestinezëve nga Gaza dhe tha se Izraeli duhet të paguajë për dëmin që ka shkaktuar atje dhe që të fillojë rindërtimi.
“Ne nuk e konsiderojmë propozimin për të dëbuar palestinezët nga tokat ku ata kanë jetuar për mijëra vjet si diçka që duhet marrë seriozisht,” tha Erdogan gjatë një vizite në Malajzi të hënën, raporton AP.
“Askush nuk ka fuqinë të detyrojë popullin palestinez të përjetojë një Nakba të dytë”, shtoi ai, duke iu referuar zhvendosjes masive të palestinezëve gjatë luftës arabo-izraelite të vitit 1948.
Erdogan, i cili është në një turne katër-ditor në Malajzi, Indonezi dhe Pakistan, theksoi shkatërrimin e rëndë në Gaza.
Ai tha se qeveria e kryeministrit izraelit Benjamin Netanyahu duhet të kërkojë fonde për të “kompensuar” për atë që ai tha se ishte dëm që arrin në 100 miliardë dollarë “në vend që të kërkojë një vend për popullin e Gazës”.
