Presidenti turk, Rejep Tayyip Erdogan ka mbërritur të martën në Romë për të marrë pjesë në samitin e 4-t ndërqeveritar midis Turqisë dhe Italisë, me ftesë të kryeministres italiane, Giorgia Meloni.
Erdogan u prit nga Meloni në një ceremoni në rezidencën Villa Pamphili në Romë.
Pas prezantimit të delegacioneve, Erdogan dhe Meloni zhvilluan një takim kokë më kokë, raporton Anadoly.
Samiti pritet të përqendrohet në hapat për të forcuar bashkëpunimin midis Turqisë dhe Italisë, së bashku me diskutimet mbi çështjet aktuale rajonale dhe globale.
Gjithashtu, do të nënshkruhen disa marrëveshje dypalëshe që synojnë forcimin e kuadrit ligjor të marrëdhënieve, si dhe është planifikuar një forum biznesi me pjesëmarrjen e komuniteteve të biznesit të të dy vendeve.
Erdogani në samit po shoqërohet nga një mori zyrtarësh dhe këshilltarësh të lartë turq.
