Pas më shumë se 50 vjetëve punë në Zvicër, erdhi të investojë në Kosovë.
Hamëz Fejza, miliona euro i shpenzojë për të ndërtuar këtë fabrikë të xhamave në fshatin Dollc të Klinës.
Por biznesi të cilin e nisi në vitin 2018 rrezikon të mbyllet.
Krejt kjo pas punimeve që po bëhen në zgjerimin e magjistrales Prishtinë – Pejë.
“Që 50 vite jam jashtë me familje kemi kursyer maksimumi për me investu në vendin tonë, me punësu popullatën tonë, mos me ik prej Kosovës, por këtu Qeveria na ka blloku totalisht. Ka ardh me ka hi brenda kur ka mujt me shku në anën e kundërtën. Na thotë Qeveria hajde mërgata investo këtu e tani të bllokojnë”, ka thënë Fejza.
Asfalti i kësaj rrugë do të kalojë deri të kjo pikë, e cila është vetëm disa metra larg dyerve të biznesit.
Kështu hyrje – daljet do të jenë të pamundura në këtë fabrikë.
“Nga ana e biznesit tonë na bllokon na mbyllet totalisht, as me kerr të vogël nuk ke qysh me hi brenda e lë më me kamionë, nuk ka as hyrje as dalje. Investimi është milionësh me teknologjie, e me ndërtim e më krejt, unë e kam lejen e ndërtimit, lejen e ambientit, lejen e kyçjes në rrugë”, pohon ai.
E para se të hapte biznesin Fejzës i ishte thënë që zgjerimi i rrugës nuk do të bëhej nga kjo pjesë.
“Kur e kam marrë lejen e punës, me than ministria se ke fat që leja bien në anën e kundërt ke fatin e mirë, edhe kur e kam marr lejen e kyçjes në rrugë që paguaj 800 euro në vit, me kanë thanë njëjtë, e di çfarë mendimi kanë këta herë këndej here andej”, deklaron ai.
Fejza madje ka dërguar ankesë edhe në Ministrin e Infrastrukturës e në Gjykatën Themelore në Pejë.
Por nga Ministria e Liburn Aliut, nuk kanë kthyer përgjigje as pas më shumë se tre javëve.
E të heshtur nga ky dikaster kanë qëndruar edhe ndaj pyetjeve që televizioni iu ka dërguar përkitazi me këtë çështje.
