Ardhja e tyre, nuk solli rezultat as herën e 45-të.
Deputetët e Kuvendit të Kosovës dështuan edhe të premten për konstituim të institucionit.
Menjëherë pas dështimit, ata fajin ia lënë njëri tjetrit.
Deputetja e Lidhjes Demokratike të Kosovës, Jehona Lushaku tha se fajtor janë ata që siç tha ajo, i kanë uzurpuar zyrat e ekzekutivit.
“Të gjithë këta që i kanë uzurpuar zyrat e qeverisë bartin përgjegjësi për gjitha këto vendime që po i marrin në mënyrë jo kushtetuese. Aq më tepër për procedura prokurimi e për procedura të tjera ku nënshkrimet validojnë për zgjedhje të cilat janë në dëm të buxhetit të Kosovës. Ne vërtetë e mirëpresim çfarëdo lloj hetimi për të sqaruar tenderët një burimor, është e pakapshme qysh një qeveri ka ardhur në pushtet, një parti politike ka ardhur në pushtet me kauzën kundër korrupsionit e tash po bëhet simbol i korrupsionit në vend”, tha Lushaku.
E gjatë kësaj jave, për një takim kryetarin e Vetëvendosjes, Albin Kurtin do e ftoj i pari i Nismës, Fatmir Limaj.
Limaj tha se do i kërkoj të pinë një kafe bashkë për të tejkaluar këtë bllokadë.
Nga Vetëvendosje po thonë se opozita po shkel rregulloren e Kuvendit të Kosovës.
“Edhe sot ishim dëshmitarë së bashku të mospjesëmarrjes në votim, të një shkelje evidente kushtetuese, e cila po ndodhë nga deputetët e deritashëm opozitar. Shto këtu faktin që brenda seancës përveçse po bëhet shkelja e dytë duke u vazhduar me diskutime nga përfaqësues të partive të deritashme opozitare, të cilat po e bëjnë shkeljen e parë duke mos marrë pjesë në votim, ndërsa shkeljen e dytë duke e vazhduar diskutimin”.
E para fillimit të seancës, para hyrjeve të këtij institucioni protestuan shoqëria civile.
Ata përmes aksionit simbolik, po kërkojnë që të tejkalohet ky ngërç.
Sipas drejtorit të Institutit Demokratik të Kosovës, Ismet Kryeziu katër liderë kanë pranuar ftesën e tyre për takim dhe vetëm Kurti jo.
Të dielën është seanca e radhës për konstituim të Kuvendit të Kosovës.
