Kandidati i Lëvizjes Vetëvendosje për kryetar të Ferizajt, Enver Haliti në emisionin “Këndi i debatit” në Tëvë1, kritikoi ashpër qeverisjen dhjetëvjeçare të PDK-së në këtë komunë.
Haliti tha se pas tri mandateve radhazi, Ferizaj ende përballet me probleme bazike që sipas tij duhej të ishin zgjidhur shumë më herët.
“PDK-ja ka qeverisur në Ferizaj për 10 vite radhazi. Një rast të tillë e kemi këtu, ku tashmë kanë kaluar 10 vite dhe as premtimet bazike nuk janë realizuar. Ferizaji sot përballet me mungesë të ujit, me problemin e mbeturinave, me qentë endacakë – çdo ditë jemi pjesë e lajmeve për këto gjëra elementare. Jemi në vitin 2025 dhe ende flasim për to,” deklaroi Haliti.
Ai shtoi se gjatë gjithë kësaj periudhe nuk është ndërtuar asnjë çerdhe publike në Ferizaj, përkundër nevojave të mëdha të qytetarëve.
“Gjatë 10 viteve, përveç këtyre gjërave elementare, nuk është ndërtuar asnjë çerdhe publike në komunën e Ferizajt gjatë mandatit të PDK-së dhe të Agim Aliut. Aktualisht komuna ka vetëm një çerdhe publike, si dhe dy të tjera gjysmë publike e private. Nevojat janë shumë të mëdha,” tha tutje ai.
Haliti theksoi se ndryshimi i qeverisjes në Ferizaj është i domosdoshëm për t’iu përgjigjur kërkesave reale të qytetarëve.
