I gjithë kulmi i banesës 10 katëshe u bë shkrumb e hi.
Të enjten mbrëma, flaka u përhap në shpejtësi të madhe te këto banesa në lagjen Kalabria në Prishtinë.
Aty, u panë edhe banorë duke kërkuar ndihmë.
Një pjesë e kulmit ra edhe poshtë lagjes por nuk pati të lënduar.
E shiritat e sigurisë nuk u larguan as pas më shumë se 12 orëve.
Zenel Zeqiri i cili e pa fillimin e flakëve nga banesa e tij përballë e përshkruan momentin e zjarrit.
Për shtatë orë, zjarrfikësit u munduan të ndalin këto flakë.
Komandanti i zjarrfikësve në Prishtinë, Malë Gashi bëri të ditur se intervenimi ka qenë shumë i vështirë dhe kanë kërkuar ndihmë shtesë.
Gashi thotë se ekipet kanë pranuar edhe ndihmë mjekësore për shkak të vështirësive.
Të premten në vendin e ngjarjes doli edhe drejtori i emergjencave në Komunën e Prishtinës, Lulzim Fushtica.
Fushtica tha se zjarri ka bërë dëme në dy kate por shkaku ende nuk dihet.
Por ai tha se për banorët do të sigurohet banimi diku tjetër.
Nga zjarri, dëme pësuan edhe lokalet në lagjen Kalabria si shkak i rënies së pjesëve të kulmit poshtë.
