Orët e para të mëngjesit, gjithçka që ishte brenda u përfshi nga flakët.
Të premten zjarri kaploi klubin e natës “Gate Club” në Prishtinë, e që shkaqet ende nuk dihen.
Në vendngjarje pati shumë ekipe të zjarrfikësve, që arritën ta lokalizojnë zjarrin.
E detaje për reagim në shuarjen e zjarrit, dha Abdusamed Shkodra, zëvendës komandant i Brigadës së Zjarrfikësve.
“Kanë fillu me fikjen e zjarrit për një kohë të shkurtë dmth është lokalizuar zjarri dhe është bërë dmth ndalimi për mos me qenë të përfshirë edhe objektet që kanë qenë afër në zjarr. Tash për momentin ekipet janë ende duke u marrë me fikje të zjarrit dhe deri në fikjen përfundimtare. Këtu vlen të ceket se të lënduar nuk ka pasë fatbardhësisht”, tha Shkodra.
Rastin e ka konfirmuar edhe Policia e Kosovës, ku kanë bërë të ditur se janë duke hetuar rrethanat që kanë çuar në këtë zjarr.
“Deri më tani nuk raportohet për të lënduar përveç dëmeve materiale. Zjarri ka prekur edhe një objekt në afërsi të objektit që po digjej, ndërkaq për shkaqe sigurie janë larguar disa automjete përreth vendit të ngjarjes. Policia në koordinim me prokurorin e shtetit ka nisur ndërmarrjen e veprimeve hetimore”, thuhet nga Policia e Kosovës.
Paraditën e së premtes pranë klubit të natës u panë edhe pronarët e saj, të cilët nuk deshën të prononcohen para kamerës për vlerën e dëmit të shkaktuar, por që reaguan përmes një komunikate.
“Ky është një moment shumë i vështirë për ne, por jemi mirënjohës që dëmi është vetëm material dhe nuk ka asnjë të lënduar. Shkaktarin e fatkeqësisë tonë ua kemi lënë në dorë autoriteteve shtetërore, besojmë që jemi në duar të sigurta. Nga sot, ne fillojmë planifikimin dhe punën për t’u rikthyer edhe më të fortë”, thanë nga “Gate Club”.
Derisa këtu dolën edhe ekipet e Kompanisë Kosovare të Distribuimit të Energjisë.
