Emisari i BE-së për dialogun Kosovë-Serbi, Peter Sorensen po qëndron për një vizitë të shkurtër në Prishtinë.
Kështu ka bërë të ditur për teve1, Klisman Kadiu – zëdhënës i Bisnik Bislimit.
Sorensen do të takohet me kreun e ekipit negociator të Kosovës, Besnik Bislimin.
Sorensen po e viziton Kosovën për herë të dytë prej se e mori detyrën në fillim të shkurtit, për t’u takuar me zyrtarë të lartë të vendit.
Gjatë qëndrimit në Prishtinë në mars, Sorensen fillimisht u takua me Osmanin dhe më pas me kryeministrin në detyrë, Albin Kurti.
Pas takimit me Kurtin, ndërmjetësi evropian tha për gazetarët se prioritet për të do të jetë të sigurojë takime mes përfaqësuesve të Kosovës dhe Serbisë. Sipas tij, janë vetë palët që pastaj do të vendosin për kompromise potenciale.
“Dialogu është për t’u siguruar që të ketë takime. Se a do të thotë kjo kompromise apo jo, u takon palëve për ta përcaktuar”, tha Sorensen, gjatë deklarimit për media, pas takimit me kryeministrin e Kosovës, Albin Kurtin.
Takimi i fundit në Bruksel i ndërmjetësuar nga Bashkimi Evropian, mes Kosovës dhe Serbisë, ishte zhvilluar më 17 dhjetor të vitit të kaluar.
