Reperi i njohur amerikan, Eminem, ka treguar publikisht pendesën e tij për tekstet e ashpra që dikur i kishte drejtuar së ëmës, Debbie Nelson.
Në vitin 2002 ai publikoi këngën “Cleanin’ Out My Closet”, e cila u bë një nga hitet më të mëdha të karrierës së tij, por gjithashtu shkaktoi polemika për shkak të toneve shumë fyese ndaj së ëmës.
Pas më shumë se një dekade, Eminem vendosi të kërkojë falje. Në vitin 2013 ai publikoi këngën “Headlights”, ku në vargje të sinqerta i drejtohet nënës me një ndjesë publike, duke pranuar se kishte shkuar tepër larg.
“Jam i penduar për ‘Cleanin’ Out My Closet’. Në atë kohë isha i zemëruar… Nuk e performoj më atë këngë dhe ndihem keq sa herë e dëgjoj në radio”,- shprehet reperi.
Eminem theksoi se marrëdhënia e vështirë që kishte pasur me nënën në fëmijëri dhe adoleshencë ndikoi shumë në tekstet e tij të hershme, por me kalimin e kohës ai kuptoi se dhimbja e shkaktuar nga fjalët ishte më e madhe se shfryrja artistike.
Për këtë arsye, “Cleanin’ Out My Closet” është zhdukur nga performancat e tij live.
Në vitet e fundit, artisti ka zgjedhur ta trajtojë me më shumë maturi temën e familjes, duke shfaqur një anë më të reflektuar të vetes.
Apologjia e tij ka marrë vlerësim të gjerë, si një shembull i rrallë i një artisti që distancohet nga një prej hiteve më të njohura për hir të së vërtetës personale dhe respektit ndaj familjes.
Ky gjest vjen në një moment të ndjeshëm, pasi së fundmi nëna e tij, Debbie Nelson, është ndarë nga jeta.
Vetëm pesë ditë pas lajmit të hidhur, Eminem u rikthye në skenë, ku emocionet ishin të dukshme, duke treguar edhe një herë se lidhja me familjen mbetet një kapitull i hapur në jetën e tij.
