Përforcimi më i ri i Clujit, Lindon Emërllahu ka folur për herë të parë si futbollist i skuadrës nga Rumania.
Emërllahu që u shpall lojtari më i mirë në Kosovë për vitin 2024, iu bashkua Clujit nga Ballkani i Suharekës për 800 mijë euro.
Mesfushori defensiv te Cluji u prezantua të martën, kurse të mërkurën tha se është shumë i lumtur që karrierën do ta vazhdoj në Rumani.
Madje, ai premtoi se do të bëjë të pamundurën për ta ndihmuar ekipin e ri që ta fitoj titullin e kampionit.
“Jam i lumtur që jam këtu, në një klub të madh si CFR Cluj, që vit pas viti është në krye të tabelës. E kam përcjellë skuadrën këtë edicion dhe dua që së bashku të kemi momente të mira. Do të jap çdo gjë për ekipin, për tifozët dhe për këto ngjyra që t’ia dalim të jemi kampionë sërish”, ka thënë Emërllahu.
Cluji ka tetë tituj kampioni të Rumanisë kurse për herë të fundit këtë sukses e ka shijuar në vitin 2022.
Aktualisht, Cluji është lider në kampionatin e Rumanisë ndërsa krahas Emërllahut, pjesë e këtij ekipi është edhe Meriton Korenica.
