Në gusht të vitit 2023 ishte arrestuar nga njësiti i Krimeve Ekonomike të Policisë së Kosovës.
Irfan Lipovica, zyrtar në Ministrinë e Industrisë, Ndërmarrësisë dhe Tregtisë ishte vënë nën pranga si i dyshuar në rastin e rezervave shtetërore.
Sipas Prokurorisë, ai me dijeni të plotë në kundërshtim me legjislacionin në fuqi ka lënë të anashkalohet procedura e hapur e Prokurimit publik për blerjen e rezervave shtetërore.
E të mërkurën në mbledhjen e Qeverisë, u mor vendim për avancimin e tij me rekomandim të ministres, Rozeta Hajdari.
Në vendim, thuhet se i njëjti është emëruar si Drejtor i Përgjithshëm i Drejtorisë së Akreditimit të Kosovës në MINT.
“Akreditimi si proces me rëndësi të lartë për ekonominë vërteton cilësinë dhe besueshmërinë e institucioneve dhe bizneseve, pasi që përmes këtij procesi vlerësohet përputhshmëria e produkteve dhe të proceseve e shërbimeve me standarde ndërkombëtare e vendore duke garantuar kështu që të ofrojë nivel të lartë të cilësisë”, tha ministrja Hajdari.
Por nga Instituti i Kosovës për Drejtësi vlerësojnë se kjo është shqetësuese dhe kundër parimit të qeverisjes së mirë.
“Është shumë e rëndësishme që secili emërim qeveritar të ruajë paraimet e qeverisjes së mirë dhe besimin e publikut në kredibiletin institucional dhe në këtë situatë që jemi dhe mesazhi që dërgohet te publiku është jashtëzakonisht negativ. Nëse shohim lajme që nëse një zyrtar që ka sinjalizuar për këtë rast i njëjti është larguar nga puna dhe në anën tjetër zyrtari për të cilin Prokuroria dyshon se është promovuar definitivisht që cenon besimin e publikut në kredibilitetin institucional”, thotë Gzim Shala nga IKD.
Sipas Shalës, një vendim i tillë duhet shfuqizuar nga pushteti ekzekutiv.
“Instituti i Kosovës për Drejtësi ka këkruar nga Qeveria rishqyrtimin e këtij vendimi dhe në anën tjetër vendosjen e standardeve të larta që secili emërim të repsektojë parimet e Qeverisjes së mirë dhe të ruajë besimin e publikut në kredibilitetin institucional… Pra përkundër faktit që edhe në situatat kur nuk ka një pengesë formale ligjore, prapë se prapë Qeveritë duhet të ndjekin dhe të respektojë parimet qeverisjes së mirë”, vlerëson ai.
Pos Lipovicës, ishin arrestuar edhe Hafiz Gara dhe biznesmeni Ridvan Muharremi, të cilët ishin liruar në fund të gushtit.
