Salla në Uashington u mbush si çdoherë.
E personalitete të ndryshme nga e gjithë bota, po bëheshin gati për lutjet e mëngjesit.
Por, vëmendjen në sallë, e morën disa burra me uniformë ushtarake.
Ishin këta ish-pjesëtarët e Brigadës 111 “Adem Jashari” të njësitit special të Ushtrisë Çlirimtare të Kosovës.
Të prirë edhe një herë nga Komandant Shkupi, arritën që emblemën e UCK-së, ta prezantojnë mes personaliteteve më të larta të politikës amerikane.
Vet Ferid Berisha, thotë për Tëvë1, se vet Uashingtoni e pranoi uniformën e veteranit të UÇK-së.
“Ka qenë shumë e veçantë se ftesën e kemi pasur si veteranë të UCK-së, dhe pasi e kemi marrë ftesën, kemi bërë kërkesë a ka mundësi ta veshim uniformën e veteranëve dhe ka zgjatë një javë derisa ata kanë pranuar”, thotë ai.
Përveç ndërkombëtareve, kjo uniformë e veteranit e zyrtarizuar se fundmi, kapi vëmendjen edhe të fqinjëve.
“Ne i kishim në tavolinë disa malazez dhe ata u mahnitën dhe kërkonin të bënim foto me neve dhe në shaka i thoshin njëri-tjetrit: po ta zënë (foton) atje (në Mal të Zi). Ka pasur edhe të shtetit serb, qysh ka qenë reagimi i tyre nuk e di sepse nuk kemi biseduar me ta, por i kemi parë”, thotë Berisha i njohur si Komandant Shkupi.
E bashkë me Shkupin në Uashington, ishte edhe ish-oficeri i ushtrisë kroate dhe UÇK-së, Esat Qollaku.
Ky i fundit thotë se veteranët, më në fund kanë një uniformë unifikuese.
“Sidomos në aktet ceremoniale, që uniformat që janë bartur në ushtritë e tjera në botë nuk ishte një faqe e mirë e shikimit nga ana e jashtme. Ky ishte qëllimi ynë, nuk ka qëllim të përfitimit. Qëllimi kryesor ka qenë që të paktën në aktet mortore kur i kemi të organizuara për veteranët e luftës që të jemi të gjithë të një fytyre, mos të dallohemi nga njëri-tjetri, sepse nuk qenë gjithë të dalluar në luftë, por të gjithë së bashku”, thotë ai.
Ky grup i ish-njësitit special të UÇK-së, Tigrat e Zi, ngriti edhe falmurin kombëar në Detroit dhe mori pjesë në festën e Pavarësisë së Kosovës në City Hall.
