Zëvendësdrejtori i Policisë për veriun, Veton Elshani, në emisionin “Info Nata” në Tëvë1 ka folur për armatimin dhe sasinë e madhe të eksplozivit të gjetur së fundmi.
Elshani ka bërë të ditur se aktualisht nuk ka persona të dyshuar lidhur me këtë rast, ndërsa hetimet janë duke u zhvilluar.
“Për momentin nuk kemi persona të dyshuar. Jemi duke i kryer hetimet. Ajo që është e rëndësishme të theksohet është se këto mjete janë gjetur në shtëpi të braktisura, jo të banueshme, dhe kjo nuk do të thotë domosdoshmërisht që pronarët e tyre të jenë të involvuar”, ka thënë Elshani.
Ai shtoi se raste të tilla janë hasur edhe më herët, kur armatimi është larguar nga shtëpitë e banimit dhe është fshehur në objekte të braktisura.
“Kemi pasur raste edhe më herët kur persona i kanë larguar armët nga shtëpitë e tyre dhe i kanë vendosur diku tjetër. Në disa nga shtëpitë që kemi bastisur kemi gjetur armë. Nuk është diçka e pazakontë të gjenden armë në shtëpi të braktisura, por ajo që e bën këtë rast të veçantë është sasia e madhe e eksplozivit, rreth 140 kilogramë”, u shpreh ai.
Duke folur për origjinën e eksplozivit, Elshani tha se bëhet fjalë për eksploziv komercial, i cili zakonisht përdoret për punë infrastrukturore, por që mund të keqpërdoret.
“Ky është eksploziv komercial, që zakonisht përdoret për punë si ndërtimi i rrugëve apo gërmime, por mund të shërbejë edhe për qëllime të tjera. Çështja është në proces hetimi dhe nuk kam liri të flas për detaje të tjera”, tha Elshani.
Ai shtoi se armatimi i gjetur në veri është kryesisht i natyrës ushtarake dhe se raste të tilla vazhdojnë të evidentohen.
“Armatimi që gjendet në veri është ushtarak. Për dallim nga pjesë të tjera të vendit, ku mund të gjendet një armë e vetme, këtu zakonisht gjenden sasi më të mëdha”, theksoi ai.
Sa i përket dyshimeve për ndërlidhje me sulmin në Banjskë, Elshani tha se për këtë nuk mund të flitet në këtë fazë.
“Nuk mund të them nëse ky armatim lidhet apo jo me Banjskën, pasi rasti është ende nën hetime”, përfundoi Elshani.
