Elezaj ka thënë se qytetarët janë dezinformuar për këtë çështje, duke theksuar se komuna është vendosur para një akti të kryer nga institucionet përgjegjëse të Kosovës dhe nuk ka pasur mundësi ligjore të refuzojë pajisjen me leje ndërtimore për kompaninë në fjalë.
“Fillimisht dua të theksoj se, duke u bazuar në Planin Zhvillimor Komunal, ne, si organ përgjegjës me ligj, kemi lëshuar një dokument që vërteton se institucionet lokale nuk kanë ndonjë interes për investime në pronën në fjalë. Dua të sqaroj para jush se lejes ndërtimore i kanë paraprirë një varg dokumentesh të lëshuara nga pushteti qendror. Fillimisht, dëgjimi publik si procedurë e parë është organizuar nga Ministria e Mjedisit dhe Planifikimit Hapësinor, për çka komuna nuk ka qenë përgjegjëse për organizimin e dëgjimit publik”, ka shkruar Elezaj në Facebook.
Tutje, ai ka theksuar se Ministria e Bujqësisë e ka bërë ndërrimin e tokës bujqësore në tokë minerare, teksa kuvendi i komunës ka marrë një vendim për anulimin e të gjitha pëlqimeve.
“Ministria e Bujqësisë e ka bërë ndërrimin e destinimit nga tokë bujqësore në tokë minerare, pastaj Ministria e Ambientit ka bërë lëshimin e pëlqimeve kundër ndotjeve të ajrit, e KPMM ka bërë lëshimin e licencave për hulumtim dhe shfrytëzim.Pastaj, kuvendi i komunës në mënyrë unanime ka marrë një vendim për anulimin e të gjitha pëlqimeve. Ministria e Administrimit të Pushtetit Lokal, që me ligj bënë mbikëqyrjen e vendimeve të institucioneve lokale, dy herë i ka vlerësuar antiligjore vendimet e kuvendit të komunës për anulimin e pëlqimeve, që si rrjedhojë vendimet e kuvendit janë pa ndonjë efekt juridik. MAPL edhe ka bërë padi në gjykatën kompetente kundër vendimit të kuvendit komunal”, ka shkruar Elezaj.
Ai ka shtuar se nuk kanë pasur mundësi ligjore ta rezuojnë lejen ndërtimore për kompaninë.
“Të gjitha këto vendime të institucioneve qendrore ne si pushtet lokal na kanë sjellur para një akti të kryer, sepse kompania në fjalë në momentin e aplikimit për leje ndërtimore i ka plotësuar të gjitha kërkesat të kërkuara sipas ligjit në fuqi. Rrjedhimisht ne nuk kemi pasur mundësi ligjore ta refuzojmë lejen ndërtimore për kompaninë. Lidhur me këtë çështje kam qenë vazhdimisht i hapur që të takoj qytetarë, ku kanë shprehur shqetësimin e tyre e po ashtu kemi qenë shumë transparentë edhe me mediat”, ka shkruar Elezaj.
Elezaj ka bërë të ditur se në ditët në vijim do të kërkojë një takim edhe me kryeministrin Albin Kurti, për të diskutuar situatën e krijuar.
Qytetarët e Dollcit të Klinës kanë protestuar sot kundër ndërtimit të fabrikës së çimentos në fshatin e tyre, pasi ata konsiderojnë se ndërtimi i kësaj fabrike do të shkaktonte ndotje të madhe të rajonit të Dukagjinit.
Në këtë protestë morën pjesë afro 2000 banorë. /Teve1.info/
