Fatura për këtë muaj i erdhi mbi 230 euro.
E për vetëm një vit, vlera e borxhit të grumbulluar i shkoi në mbi 3 mijë e 600 euro.
Për këtë arsye, disa shtëpive të fshatit Çabër të Zubin Potokut, kompania serbe “Elektrosever” ua shkyçi energjinë elektrike.
Këtë fat e pati edhe shtëpia e Sefer Mehmetit në këtë fshat.
Por, ky i fundit që është pa energji elektrike tash e një muaj, thotë se gjithçka filloi kur “Elektroseveri” ua vendosi këta njehsorë jashtë shtëpive.
“Muajin e parë kur na i kanë ngjitur orët, sepse përpos në Çabër nuk kanë ngjitë njehsor të ri askund, të fshatrat serbe jo. Kur erdhën faturat e para të janarit dhe shkurtit, sepse erdhi fatura 497 euro. Kam bërë ankesa sepse s’ka shanse me një nxemje brenda, bojleri me harxhua kaq shumë”, thotw Mehmeti.
Ai tregon se sa i vjen fatura e energjisë elektrike çdo muaj.
“Çdo faturë është nga 230 deri në 500 euro. Dmth për 10 muaj janë bërë 3600 euro. Isha u ankova, më thanë kemi me këput rrymën, e më kërkuan që 10% të borxhit ta paguaj çdo muaj, që i binte nga 362 euro në muaj”, shprehet ky banor i Çabrës.
Pas gjithë kësaj, Mehmeti thotë se disa herë u ankua në kompaninë serbe që e bën furnizimin dhe faturimin e energjisë elektrike në katër komunat veriore të vendit.
“I kam bërë ankesat përmes eKosovës, i kam dorëzuar në “Elektroserver” që 15 ditë, por nuk i kanë marrë parasysh. Ky njehsor nuk është mirë, sepse krejt këto shtëpi përreth nuk paguajnë 40-50 euro rrymë në muaj, por tek unë vjen paushall fatura 230 euro pa shpenzuar asgjë”, thotë ai.
Për këtë problem, Tëvë1 ka dërguar pyetje edhe në “Elektrosever”.
Por, deri në momentin e publikimit të kronikës, nuk ka marrë përgjigje
