Barcelona dhe Real Madridi, do të përballen për herë të parë këtë edicion në ndeshjen që do ta ketë vëmendjen e xhiros së 11-të në La Ligan e Spanjës. “El Clasico”, do të luhet të shtunën prej orës 16:15, ndërsa si Barça ashtu edhe Reali, synojnë fitoren në derbin më të madh të Spanjës. Fitorja e Barcelonës, do të bënte që ekipi i trajnerit Xavi Hernandez ta parakalojë Realin në tabelë, i cili ka një pikë më shumë.
Aktualisht, Reali ka 25 pikë pas pesë ndeshjeve të zhvilluara dhe në rast të fitores në “El Clasico” do të shkëputej në katër pikë nga Barcelona, ekipi i vetëm në kampionat këtë edicion që nuk di për humbje. Ka 7 fitore dhe tri barazime për dallim prej Realit që krahas tetë fitoreve ka edhe një barazim e një humbje. Megjithatë, Reali pritet të jetë më i kompletuar se Barcelona pasi anglezi Jude Bellingham ka stërvitur të premten dhe do të jetë i gatshëm për lojë. Po ashtu, Realit i është kthyer nga lëndimi edhe Dani Ceballos. Për Bellinghamin, ky do të jetë “El Clasico” i parë dhe anglezi do të përpiqet të konfirmohet si lojtari kryesor i Realit edhe në këtë ndeshje.
Deri më tani, Bellingham ka shënuar 11 gola në 12 paraqitje për Real Madridin dhe te Barcelona e kanë parasysh formën e tij të mirë. Barcelona ka luajtur muajin e fundit pa katër titullarë, të cilët po ashtu të premten janë rikthyer në stërvitje por trajneri Xavi nuk ka dhënë detaje se a do të jenë të gjithë të gatshëm për lojë.
Robert Lewandowski, Frenkie De Jong, Pedri dhe Jules Kounde janë stërvitur me pjesën tjetër të ekipit një ditë para “El Clasicos”. Të gjithë, janë lojtarë të rëndësishëm për Xavin, i cili ka thënë se ndaj Realit do të luajnë ata që janë 100 për qind të gatshëm për lojë.
Të shtunën, por prej orës 18:30, Mallorca e Vedat Muriqit e pret skuadrën e Getafes. Ndërkohë, Atletico Madridi që është i katërti në tabelë me 22 pikë, luan në shtëpi të dielën prej orës 21:00 me Alavesin.
