Policia e Kosovës ka njoftuar se të enjten është realizuar me sukses ekstradimi nga Hungaria në Kosovë i të dënuarit S.T., 49 vjeç, nga fshati Gjonaj i Komunës së Prizrenit, i cili kishte qëndrim të përkohshëm në Hungari.
Ekstradimi është kryer në bazë të urdhër-arrestit ndërkombëtar të lëshuar nga Gjykata Themelore në Prizren, për veprat penale: Blerja, posedimi, shpërndarja dhe shitja e paautorizuar e narkotikëve dhe substancave analoge, “ultivimi i bimës së hashashit, shkurres së kokainës ose bimëve të kanabisit” dhe “Mbajtja në pronësi, kontroll ose posedim të paautorizuar të armëve”.
Sipas Policisë, i dënuari ishte shpallur në kërkim pasi i ishte shmangur vuajtjes së dënimit, që përfshin 3 vite e 10 muaj burgim dhe një gjobë prej 4,000 eurosh.
I ekstraduari është dorëzuar fillimisht nga autoritetet kompetente hungareze, pastaj është pranuar nga zyrtarët relevantë në Kosovë dhe më pas është transferuar nga policët e Stacionit Policor Prizren në Qendrën e Paraburgimit.
Policia e Kosovës ka falënderuar autoritetet italiane për bashkëpunimin ndërinstitucional dhe ka theksuar se mbetet e përkushtuar në zbatimin e urdhër-arresteve dhe procedurave ligjore në funksion të drejtësisë dhe sigurisë publike./teve1.info/
