Si rezultat i bashkëpunimit dhe shkëmbimit të informacioneve ndërmjet specialistëve të Interpol Tiranës dhe specialistëve të Interpol Podgoricës, u kap në Mal të Zi dhe u ekstradua në Shqipëri shtetasi shqiptar, i shpallur në kërkim ndërkombëtar M. D. (31), raporton KosovaPress.
Në prill të këtij viti, Gjykata e Lezhës kishte caktuar ndaj 31-vjeçarit, i lindur në Lezhë, masën e sigurisë arrest në burg për veprën penale kultivimi i bimëve narkotike në Gocaj dhe Rraboshtë të Lezhës, të cilat janë përpunuar më pas me qëllim shitjen.
Shitja e lëndës narkotike u parandalua si rezultat i ndërhyrjes së shërbimeve të Policisë së Lezhës, në kuadër të operacionit “Vakumi”, të cilat sekuestruan në fshatin Balldre, në muajin prill të këtij viti tre thasë me rreth 34 kilogramë kanabis.
