Agjencia e Statistikave të Kosovës (ASK) ka publikuar të dhënat për tregtinë e jashtme të mallrave për muajin shtator të vitit 2025, duke theksuar një mbulim të eksporteve ndaj importeve prej vetëm 14,1%.
Sipas të dhënave të ASK-së, rezulton një deficit tregtar prej 21,2% në krahasim me vitin 2024, që përkthehet në një vlerë prej 520,5 milionë euro, krahasuar me 429,4 milionë euro deficit në të njëjtën periudhë të vitit të kaluar.
Eksportet e Kosovës në shtator 2025 arritën në vlerën 85,8 milionë euro, ndërsa importet u rritën në 606,2 milionë euro, duke shënuar një rritje prej 10,7% për eksportet dhe 19,6% për importet krahasuar me vitin 2024.
Sipas të dhënave të grupeve kryesore të eksportit: 19,1% e përbëjnë metalet bazë dhe artikujt prej tyre; 12,5% e përbëjnë plastika, goma dhe artikujt prej tyre; 12,4% e përbëjnë produktet minerale; 11,5% e përbëjnë ushqimet e përgatitura, pijet dhe duhani; 9,5% e përbëjnë artikujt e ndryshëm të prodhuar; 7,7% e përbëjnë produktet bimore.
Ndërkohë, për importet: 14,6% e përbëjnë produktet minerale; 11,3% e përbëjnë makineritë, pajisjet mekanike dhe elektrike; 11,3% e përbëjnë metalet bazë dhe artikujt prej tyre; 11,2% e përbëjnë ushqimet e përgatitura, pijet dhe duhani; 10,0% e përbëjnë mjetet e transportit.
Po ashtu, janë publikuar edhe të dhënat për tregtinë me vendet e BE-së.
Eksportet në këtë rajon arritën në 28,0 milionë euro, që përbën 32,7% të eksporteve të përgjithshme, me një rritje prej 2,6% krahasuar me vitin 2024.
Gjermania ishte partneri kryesor, duke përbërë 11,5% të eksporteve, e pasuar nga Italia (2,9%) dhe Holanda (2,6%).
Importet nga BE ishin 249,4 milionë euro, ose 41,1% e importeve totale, me një rritje prej 17,3%.
Vendet me pjesëmarrje më të lartë për import ishin Gjermania (12,7%), Italia (6,1%) dhe Polonia (3,4%).
Për tregtinë me vendet e CEFTA-s, eksportet arritën në 40,6 milionë euro, që përbën 47,4% të eksporteve të përgjithshme, me një rritje prej 21,4%. Partnerët kryesorë për eksport ishin Shqipëria (21,4%), Maqedonia e Veriut (11,0%), dhe Serbia (8,4%).
Importet nga këto vende arritën në 87,8 milionë euro, që përbën 14,5% të importeve totale, me një rritje prej 34,4%. Maqedonia e Veriut (5,6%), Shqipëria (3,6%) dhe Serbia (3,5%) kishin pjesëmarrje më të lartë.
Eksportet e Kosovës me vendet e tjera arritën në 17,1 milionë euro, ose 19,9% të eksporteve totale.
Partnerët më të rëndësishëm ishin Zvicra (11,0%) dhe Turqia (3,7%).
Importet me këto vende arritën në 269,0 milionë euro, ose 44,4% të importeve totale, me pjesëmarrje më të lartë nga Kina (15,6%) dhe Turqia (12,8%).
