Mbyllja e platformës sociale Tik Tok është diskutuar edhe në Kosovë. Por sipas ekspertëve të kibernetikës, qytetarët nuk duhet të privohen nga shfrytëzimi i kësaj platforme. Ekonomistët thonë se shumë familje sigurojnë të hyra duke promovuar bizneset e tyre në këtë platformë.
Mbyllja e platformës sociale Tik Tok po ndodhë në disa shtete të botës dhe së fundmi, vendimin për mbylljen e kësaj platforme e mori edhe Shqipëria.
Që të ndërmerret ky hap edhe në Kosovë është diskutuar nga Komisioni për Çështje të Sigurisë.
Ndonëse edhe Kosova e diskuton mbylljen, institucionet as që kanë dërguar ndonjë kërkesë që vendi të ketë domenin e vet jo vetëm për Tik-Tok, por dhe për platformat tjera.
Por si e shohin ekspertët e kibernetikës mbylljen e Tik-Tokut?
“Qytetarët e Republikës së Kosovës të mos privohen kushtimisht nga shfrytëzimi i një platforme, sepse kushtëzimi i qytetarëve ndaj një platforme krijon monopolin e platformës tjetër dhe kjo më pastaj bjen kushtimisht mos ofrimin e asaj që dëshirojnë qytetarët, që të kenë lirinë e shprehjes, mendimit dhe eksplorimit të mundësive të ndryshme, të cilat i shohim çdoherë më pak në rrjetin social facebook”, thotë Mentor Hoxha, ekspert i Kibernetikës.
Sipas Hoxhës, kjo qeveri por edhe qeveritë e kaluara sfidë e kanë të kuptuarit hapësirën kibernetike.
“Në këtë drejtim ne kemi një diskrepancë të shqetësimeve të cilat ngriten nga qytetarët, nga institucionet, qoftë institucionet e sigurisë apo institucionet e tjera dhe një mos respektim të këtyre shqetësimeve, mos adresim të këtyre shqetësimeve”, thotë Hoxha.
E përmes këtij rrjeti social, sipas ekonomistit Jakup Bellaqa, shumë familje sigurojnë të hyra.
Prandaj mbylljen e tik-tokut nuk e sheh të duhur.
“Në aspektin ekonomik ndikon negativisht, sepse shumë biznese, shumë familje, shumë qytetarë të RKS sigurojnë të hyra. Është jo etike dhe jo e moralshme që të mbyllet tik toku sepse është një rrjet social i cili shfrytëzohet për promovim në aspektin ekonomik, si tek bizneset ashtu edhe tek një pjesë e madhe e shoqërisë”, shprehet ai.
Vendet Perëndimore kanë shprehur shqetësime ndaj Platformës kineze Tik-Tok për shkak të vjedhjes dhe keqpërdorimit të të dhënave, kurse në Kosovë e Shqipëri, mungesa e kujdesit institucional ndaj fëmijëve sipas ekspertëve duket se po shtyn vendet të ndalojnë përdorimin e kësaj platforme.
