Pas Frederic Veselit, kampionia e Shqipërisë në futboll, Egnatia po e synon një reprezentues tjetër të Kombëtares së Shqipërisë.
Sipas mediumeve në Shqipëri, bëhet fjalë për portierin Etrit Berisha, i cili mund të jetë përforcimi I madh i Egnatinas në afatin kalimtar të janarit.
Në fakt, Berisha është lojtar i lirë dhe ideja për t’u zhvendosur në Kategorinë Superiore deri në fund të sezonit po duket e realizueshme.
Kjo do t’i jepte mundësinë Berishës të ketë minutazhë dhe të rikthehet sërish protagonist në fushën e lojës, me synim për të siguruar një transferim në Evropë për sezonin e ardhshëm.
Realizimi i këtij transferi nuk do të jetë aspak i lehtë për shkak të kërkesave të larta financiare të Berishës, por tek Egnatia nuk po heqin dorë nga kjo ide.
Berisha 35-vjeçar prej korrikut të këtij viti është pa klub pasi i skadoi kontrata me Empolin, ndërsa në Itali ka bërë karrierë edhe te Torino, SPAL-i, Atalanta e Lazio.
Ai gjithashtu ka edhe 80 paraqitje me fanellën e Kombëtares së Shqipërisë.
