Në një deklaratë gjatë intervistës së tij të parë me median ndërkombëtare pas fitores për një mandat të katërt si kryeministër i Shqipërisë, Edi Rama kritikoi ashpër planin e Mbretërisë së Bashkuar për të dërguar azilkërkuesit e refuzuar në “qendra kthimi” në vende të treta.
Rama tha se ideja që Britania të kërkonte vende të tjera për të larguar emigrantët e padëshiruar do të ishte e paimagjinueshme një dekadë më parë.
“Është një nga ato gjëra që 10 vjet më parë thjesht nuk do të kishte qenë e imagjinueshme,” deklaroi ai nga Tirana.
“Fakti që sot jo vetëm që është e imagjinueshme, por po ndodh, nuk është për shkak të Keir Starmer apo Rishi Sunak që po bëjnë diçka të jashtëzakonshme; është sepse vendi është në një pozitë shumë të errët.”
Plani i diskutueshëm për të krijuar “qendra kthimi” në vende të treta, i njoftuar nga lideri laburist, Keir Starmer gjatë një vizite të fundit në Shqipëri, do të përfshijë përpunimin e kërkesave të azilkërkuesve që kanë shteruar të gjitha rrugët ligjore në Mbretërinë e Bashkuar, shkruan The Guardian.
Rama e cilësoi këtë qasje si pjesë e një ndryshimi të thellë në diskursin publik britanik që nga Brexit-i.
“Tetëdhjetë për qind e gjërave që thuhen, shkruhen ose pranohen si pjesë normale e diskursit në Britaninë e sotme janë gjëra që [para Brexit] do të kishin qenë krejtësisht të papranueshme, krejtësisht qesharake, krejtësisht të turpshme,” shtoi ai.
