Edhe pas dështimit të seancës konstituive, disa deputetë të zgjedhur të Kuvendit të Kosovës nga rradhët e partive ish-opozitare po vazhdojnë të qëndrojnë në sallë.
Deputetja e Partisë Demokratike e Kosovës, Sala Jashari, gjatë fjalimit të saj i ka bërë thirrje Lëvizjes Vetëvendosje për kompromis, përgjegjësi dhe respekt ndaj institucioneve demokratike të Kosovës.
“Kuvendi i Kosovës nuk është arenë e arrogancës por tempull i demokracisë..”, ka thënë ajo.
Ndërkaq, deputeti i Lidhjes Demokratike të Kosovës, Besian Mustafa kritikoi qëndrimet e grupit më të madh parlamentar të dalur nga zgjedhjet e 9 shkurtit, duke thënë se Vetëvendosje ka mundësi për të zgjedhur krizën politike të krijuar.
“Në këtë parlament, disa parti politike janë shprehur se kanë vullnet të votojnë një emër tjetër dhe jo atë të Albulena Haxhiut, pra ka hapësirë për të krijuar 61 vota. Fatkeqësisht Vetëvendosje me të vetmen ide për të bllokuar Kuvendin e Kosovës, refuzon të marrë parasysh këto oferta për një emër tjetër. Kemi një inflacion një rritje të çmime të papërballueshme për kuletën familjare, është parë që familjet po përgatiten për fillimin e vitit të ri shkollor, por shteti është zhdukur, shteti është reduktuar në një emër të vetëm, Albulena Haxhiu. Për Vetëvendosjen ajo është më e rëndësishme se çdo qytetar i Republikës së Kosovës, për Vetëvendosjen ‘o zgjidhet Albulena Haxhiu kryetare e Kuvendit, o flaka i daltë këtij vendi’. Ka emra që janë të pranueshëm për disa parti politike, le të ulen le të flasin le të arrijnë një marrëveshje politike”, ka theksuar Mustafa.
