Numri i minatorëve të Trepçës të cilët po kërkojnë ndihmë mjekësore po vazhdon të rritet.
Edhe sot një grevisti i është përkeqësuar gjendja shëndetësore, dhe është bartur nga miniera për të marrë ndihmë mjekësore, përcjell teve1.info
Tashmë minatorët e Trepçës kanë hyrë në ditën e tetë të grevës.
Kërkesat e tyre janë realizimi i pagës nga data 6 deri me datën 10 të çdo muaji, dorëheqja apo shkarkimi i u.d i kryeshefit, Enis Abdurrahmani dhe kërkesa për sigurim shëndetësor dhe përmirësimin e kushteve.
Në mbledhjen e sotme të Komisionit për Ekonomi, ishte paraparë të raportonte ministrja Artane Rizvanolli rreth situatës në Trepçë, por e njëjta kishte njoftuar se është në udhëtim jashtë vendit.
Ndërkaq me ftesë të Lëvizjes Vetëvendosje, sindikalistët e Trepçës kanë zhvilluar takim me anëtarët e Komisionit për Ekonomi.
Me këtë rast, kryetari i Sindikatës së punëtorëve të Trepçës, Ibrahim Jonuzi bëri thirrje që grevës së minatorëve të mos i jipet konatacion politik, pasi siç theksoi ai, jeta e minatorëve është në rrezik dhe shumë prej tyre janë në gjendje të rëndë shëndetësore.
Jonuzi është shprehur se kjo çështje duhet të shkojë jashtë politikës, dhe humanizimi të vendoset në rend të parë. /Teve1.info/
