Gjykata Themelore në Prishtinë ua ka vazhduar edhe për nga dy muaj të tjerë masën e paraburgimit Naim Murselit, Kushtrim Kokallës dhe Granit Plavës, të cilët dyshohen për vrasjen e Liridona Ademajt.
Këtë e ka konfirmuar për tëvë1.info, zëdhënësja e Gjykatës Themelore në Prishtinë, Mirlinda Gashi.
Sipas Gashit, tre të dyshuarve u është vazhduar masa e paraburgimit deri më 24 dhjetor 2024.
“Ju njoftojmë se me datë 24.10.2024 Gjykata Themelore në Prishtinë – Departamenti për Krime të Rënda ka aprovuar kërkesën e Prokurorisë Themelore në Prishtinë për vazhdimin e masës së paraburgimit, në çështjen penale ndaj të pandehurve N.M, G.P dhe K.K. Të pandehurve N.M, G.P dhe K.K iu është vazhduar masa e paraburgimit në kohëzgjatje prej (2) muaj për secilin, e cila masë do ju zgjasë deri me datë 24.12.2024”, konfirmoi Gashi.
Liridona Ademaj u vra në moshën 30-vjeçare, më 29 nëntor të vitit të kaluar, në rrugën “Dalip Alshiqi” në Prishtinë. Fillimisht, Policia e Kosovës, e kishte raportuar rastin si “grabitje me pasoja të vrasjes”.
Por, dy ditë më vonë, më 1 dhjetor 2023, Policia njoftoi për arrestimin e dy personave, në mesin e të cilëve edhe bashkëshorti i saj, Naim Murseli.
