Pas Arbër Zenelit, edhe Mario Balotelli pritet ta shkëputë kontratën me klubin turk, Adana Demirspor.
Balotelli ndërkohë e ka ëndërr të kthehet sërish në elitën e futbollit italian. Një prej skuadrave të interesuara për shërbimet e tij është Salernitana, skuadra e fundit në tabelën e Serie A me 12 pikë.
“Është një projekt për kthimin e tij në Itali. Do të shohim çfarë do të ndodh”, ka thënë të premten menaxheri Enzo Raiola, për mediumin italian “Sportmediaset”.
33-vjeçari ende po shpreson se mund të fitojë një vend te Italia për Evropianin që organizohet në Gjermani. Balotelli në të kaluarën ka luajtur edhe për ekipe si Interi, Manchester City e Liverpooli.
