Ditë me diell ishte edhe dita kur u vra.
Të shtunën u bënë 35 vjet nga rënia e dëshmorit Fadil Talla nga fshati Letanc i Podujevës.
E më të vështirë e kishte babai i tij, Nazmi Talla.
Pasi para syve të tij, iu vra djali 25-vjeçar të cilin planifikonte ta fejonte disa ditë më vonë.
“E si ta përshkruaj, 25 vjeçar, të enjten është vrarë e të dielën kam pasur ta fejojë, mirëpo e dija, vëzhgimet e tyre ato sjelljet e tyre të egra të çartura që nuk isha mësua me pa ushtrinë e kisha parandjenjën që do të ndodhë diçka por nuk e kisha që djalin tim por që e kisha 7 metra larg dhe doja ti thoja tërhiqu pak mbrapa largohu prej rrugës në bazë të asaj çka shihsha por nuk munda të flas deri sa edhe kanë shtënë më revole”, tha babai i dëshmorit Fadil Talla.
Ai nuk ka fjalë ta përshkruaj djalin e tij.
“Nuk mund ta përshkruajë, ai nuk ka pasur fjalë, ai u skuqke kur folke me dikënd ashtu i tillë ka qenë, por çka me bë jeta vazhdon”, tregon babai i dëshmorit.
E 16 vjeçar në atë kohë, Florim Statovci, kujton atë ditë kur është vrarë Fadil Talla.
“Në atë ditë për fat të keq ka qenë krejt Podujeva e rrethuar ku ne si të ri kemi marrë pjesë në atë demonstratë dhe më kujtohet atë ditë rënia e Fadil Tallës, ka qenë shumë e rëndë sepse erdhën tenkat dhe u kthyen në drejtim të tyre të protestuesve dhe hasi me zjarr ku ra dëshmor Fadil Talla”, tha sekretari i OVL-së në Podujevë, Florim Statovci.
Për homazhe te varri i dëshmorit Fadil Talla, i pranishëm ishte ministrja e Arsimit, Arbërie Nagavci dhe kryetari i Podujevës, Shpejtim Bulliqi me një pjesë të kabinetit të tij. /teve1.info/
