Qytetari që u arrestua pas një përplasjeje verbale me deputeten e Lëvizjes Vetëvendosje, Fitore Pacolli, është liruar nga Policia e Kosovës, ndërsa ndaj tij është iniciuar hetim për veprën penale “Kanosje”.
Lajmin e ka konfirmuar zëdhënësi i Policisë për rajonin e Prishtinës, Agron Borovci, i cili tha se i dyshuari është intervistuar dhe më pas është proceduar i lirë me rekomandimin e prokurorit të shtetit.
“Referuar këtij rasti, i dyshuari është ftuar për intervistim nga ana e policisë dhe me rekomandimin e prokurorit të shtetit, ndaj tij është iniciuar një hetim në drejtim të veprës penale ‘Kanosja’, dhe i njëjti më pas është proceduar i lirë”, ka deklaruar Borovci për Tëvë1.
Ngjarja ndodhi në një kafene në Prishtinë, ku qytetari i është afruar tavolinës së deputetes Pacolli dhe, në shenjë proteste, i ka ofruar t’ia paguajë faturën, duke e quajtur “hajne” dhe duke e akuzuar për përfitime familjare nga buxheti i shtetit.
Deputetja Pacolli, sipas pamjeve të publikuara, reagoi ashpër duke e kundërshtuar qytetarin, ndërsa më pas ndërhyri edhe Policia.
Deputetja Pacolli përballet me akuza në lokal – qytetari arrestohet pas përplasjes
